1. gr.
Nafn félagsins er NBI hf.
2. gr.
Heimilisfang félagsins er Austurstræti 11, 155 Reykjavík, og varnarþing þess er í Reykjavík.
Stofnun félagsins er liður í aðgerð skv. heimild í 5. gr. laga um heimild til fjárveitinga úr ríkissjóði vegna sérstakra aðstæðna á fjármálamarkaði o.fl.
3. gr.
Tilgangur félagsins er að starfrækja viðskiptabanka. Skal félaginu heimilt að stunda hverja þá starfsemi sem fjármálafyrirtækjum er heimil lögum samkvæmt á hverjum tíma sem og aðra starfsemi í eðlilegum tengslum við hana.
Félaginu er heimilt að taka þátt í starfsemi sem samrýmist rekstri þess og gerast eignaraðili í öðrum hlutafélögum í því skyni.
4. gr.
Hlutafé félagsins er kr. 775.000.000.- -krónur sjöhundruðogsjötíuogfimmmilljónir 00/100-. Hlutafé skiptist í einnar krónu hluti eða margfeldi þeirrar fjárhæðar. Gefa má út eitt hlutabréf fyrir öllu hlutafé hluthafa í félaginu og gildir það sama við aukningu hlutafjár.
Bankaráði NBI hf. er heimilt að auka hlutafé NBI um allt að kr. 200.000.000.000.- -krónur tvöhundruðmilljarðar með útgáfu nýs hlutafjár í NBI hf. Hluthafar njóta forgangsréttar til áskriftar í samræmi við 1. mgr. 34. gr. laga nr. 2/1995. Engin sérréttindi fylgja hlutum í félaginu. Stjórninni er falið að ákveða nánari útfærslu á hækkun þessari m.t.t. til verðs og greiðsluskilmála. Heimild þessi gildir til 21. október 2013.
5. gr.
Hlutabréf skulu tölusett og skráð á nafn. Hlutabréf veita hluthafa full réttindi sem samþykktir þessar og lög um hlutafélög mæla fyrir um.
6. gr.
Um hlutabréf í hlutafélaginu gilda venjulegar reglur viðskiptabréfa.
7. gr.
Æðsta vald í málefnum félagsins er í höndum lögmætra hluthafafunda.
8. gr.
Hluthafafundi skal boða með almennri auglýsingu með a.m.k. viku fyrirvara.
9. gr.
Aðalfundi félagsins skal halda fyrir lok apríl mánaðar ár hvert.
10. gr.
Á aðalfundi félagsins skulu þessi mál tekin fyrir:
- Skýrsla stjórnar félagsins
- Staðfesting efnahagsreiknings og rekstrarreiknings fyrir næstliðið rekstrarár.
- Hvernig skuli fara með hagnað eða tap félagsins á næstliðnu rekstrarári.
- Kosning stjórnarmanna
- Tillaga stjórnar um starfskjarastefnu lögð fram til samþykktar
- Kosning endurskoðanda
- Ákvörðun um þóknun bankaráðsmanna fyrir störf þeirra á næsta ári
- Önnur mál.
11. gr.
Eitt atkvæði fylgir hverri krónu í hlutafé.
Hluthafi getur með skriflegu umboði veitt umboðsmanni heimild til að sækja hluthafafund og fara þar með atkvæðisrétt sinn.
Á hluthafafundi ræður afl atkvæða, nema öðruvísi sé fyrir mælt í landslögum eða samþykktum þessum.
12. gr.
Fundargerðarbók skal haldin og í hana skráð það sem gerist á hluthafafundum.
13. gr.
Reikningsár félagsins er almanaksárið. Bankaráð skal hafa lokið gerð ársreikninga eigi síðar en einum mánuði fyrir aðalfund.
14. gr.
Stjórn félagsins, sem í samþykktum þessum nefnist bankaráð, skal skipuð fimm mönnum og jafnmörgum til vara. Formann skal kjósa sérstaklega en stjórnin skiptir að öðru leyti með sér störfum.
Endurskoðandi félagsins er Ríkisendurskoðandi.
Kjörtímabil stjórnarmanna er eitt ár.
15. gr.
Þrír bankaráðsmenn rita félagið fullkominni ritun.
Bankaráð veitir prókúruumboð fyrir félagið.
Bankaráð hefur heimild til að skuldbinda það, þar á meðal til veðsetningar eigna félagsins. Ef selja á meiri háttar eignir félagsins, sem hafa veruleg áhrif á starfsemi og rekstur fyrirtækisins, þarf til þess samþykki meirihluta hluthafa.
Á stjórnarfundum ræður afl atkvæða afgreiðslu mála samkvæmt einföldum meirihluta. Verði atkvæði jöfn ræður atkvæði formanns úrslitum.
Skrá skal fundargerð hvers stjórnarfundar í fundargerðarbók.
16. gr.
Bankaráð ræður framkvæmdastjóra og ákveður starfskjör hans.
Framkvæmdastjóri hefur með höndum stjórn á daglegum rekstri félagsins og kemur fram fyrir þess hönd í öllum málum sem varða venjulegan rekstur. Hann sér um reikningshald og ráðningu starfsliðs. Framkvæmdastjóra ber að veita bankaráðsmönnum og endurskoðanda allar upplýsingar um rekstur félagsins sem þeir kunna að óska og veita ber samkvæmt lögum.
17. gr.
Engin sérréttindi fylgja hlutum í félaginu. Hluthafi þarf ekki að sæta innlausn hluta sinna, nema félaginu verði slitið eða hlutaféð löglega lækkað.
18. gr.
Samþykktum þessum má breyta á lögmætum aðalfundi eða aukafundi með 2/3 hlutum greiddra atkvæða, svo og með samþykki hluthafa sem ráða yfir a.m.k. 2/3 hlutum af því hlutafé í félaginu sem farið er með atkvæði fyrir á fundinum, enda sé mætt fyrir a.m.k. helming hluthafa á fundinum og annað atkvæðamagn ekki áskilið í samþykktum eða landslögum.
19. gr.
Tillögur um slit eða skipti á félaginu má taka fyrir á aðalfundi eða aukafundi, enda sé tillagna getið í fundarboði. Til þess að ákvörðun um slit eða skipti sé gild þarf samþykki hluthafa sem ráða yfir a.m.k. 2/3 hlutum af heildarhlutafé félagsins.
Hluthafafundur, sem tekið hefur löglega ákvörðun um slit eða skipti félagsins, skal einnig ákveða ráðstöfun eigna og greiðslu skulda.
20. gr.
Að því leyti sem ekki er kveðið á um í samþykktum þessum gilda ákvæði hlutafélagalaga, nú laga nr. 2/1995, með síðari breytingum, svo og önnur ákvæði laga er við geta átt.
Þannig samþykkt á stofnfundi Nýja Landsbanka Íslands hf. (nú NBI hf.), Reykjavík, 7. október 2008 og með breytingum samþykktum á hluthafafundi 21. október 2008.
Reykjavík, 21. október 2008
f.h. NBI hf.
S. Elín Sigfúsdóttir, bankastjóri.
Samþykktir á prentvænu formi
