Fréttir og tilkynningar - 7. júlí 2010 14:08

Landsbankinn býður fastar greiðslur og endurreikning lána

• Öllum einstaklingum sem tekið hafa fasteignalán í erlendri mynt með veði í íbúðarhúsnæði býðst að greiða lága fasta mánaðarlega greiðslu, þar til skorið verður úr um réttarágreining fyrir dómstólum.
• Föst mánaðarleg greiðsla verður 5.000 krónur af hverri milljón til 1. nóvember. Greiðslubyrðin miðast við upprunalegan höfuðstól lánanna.
• Hluti fasteignalána í erlendri mynt verður endurreiknaður samkvæmt dómi Hæstaréttar og tilmælum Seðlabanka Íslands og Fjármálaeftirlitsins. Höfuðstóll lækkar verulega.
• Betri réttur neytenda stendur óhaggaður.

Fastar greiðslur til 1. nóvember

Öllum einstaklingum sem eru með fasteignalán í erlendri mynt til lengri tíma en 5 ára, með reglulegum afborgunum og veð í íbúðarhúsnæði býðst nú að greiða lága mánaðarlega greiðslu fram til 1. nóvember 2010.

Greiðslurnar miðast við 5.000 krónur á mánuði fyrir hverja milljón sem getur þýtt verulega lækkun á greiðslubyrði á meðan á þessum tíma stendur.

Miðað er við upprunalegan höfuðstól láns. Þannig yrði greiðsla af láni sem upphaflega var 10 milljónir króna, 50.000 krónur á mánuði.

Þetta úrræði er hluti af almennum úrræðum bankans fyrir einstaklinga í greiðsluerfiðleikum og þarf að sækja sérstaklegan um það fyrir 30. september. Hægt verður að sækja um á netinu, eða útibúum Landsbankans.

Viðskiptavinum banka og sparisjóða bjóðast sömu kjör þegar kemur að föstum greiðslum af lánum og hafa viðræður um þau farið fram með leyfi Samkeppniseftirlitsins. Samkeppniseftirlitið hefur fallist á að þessi kjör megi allir bjóða til 1. nóvember, en eftir þann tíma verður að sækja um framlengingu hafi dómstólar þá ekki eytt óvissu um álitamál.

Hluti fasteignalána einstaklinga endurreiknaður

Eftir athugun á lánasafni Landsbankans, telur bankinn að dómurinn taki til tiltekinna skuldabréfa vegna fasteignalána einstaklinga. Sú niðurstaða er byggð á mati lögfræðinga bankans sem og lögfræðiáliti sem aflað hefur verið frá lögmönnum utan hans.

Í tilmælum FME og Seðlabanka til fjármálafyrirtækja frá 30. júní segir orðrétt að þegar reiknaðir eru vextir af lánum sem að mati fjármálafyrirtækis innihalda óskuldbindandi gengistryggingarákvæði, skuli ,,...í stað gengistryggingar og erlends vaxtaviðmiðs miða við vexti sem Seðlabanki Íslands ákveður með hliðsjón af lægstu vöxtum á nýjum almennum óverðtryggðum útlánum eða ef verðtrygging er valin lægstu vöxtum á nýjum almennum verðtryggðum útlánum og beitt er þegar óvissa ríkir um lánakjör sbr. 18. og 4. gr. laga nr. 38/2001 um vexti og verðtryggingu, nema aðilar semji um annað."

Lánum þeirra einstaklinga sem fengu slík skuldabréf verður breytt 1. september til samræmis við tilmæli FME og Seðlabankans.

Viðskiptavinir Landsbankans geta valið

Óski lánþegar með fyrrnefnd skuldabréf ekki eftir því að lán þeirra verði endurreiknuð, er þeim bent á að snúa sér til bankans fyrir 15. ágúst.

Þeir geta þá valið um að halda hinu erlenda láni sínu og greiða af því á sama hátt og áður telji þeir það hagstæðara, eða óskað eftir því að greiða tímabundið fastar greiðslur á sama hátt og greint var frá hér að ofan.

Samkvæmt bráðabirgðaútreikningum Landsbankans lækkar höfuðstóll þeirra fasteignalána sem falla undir dóminn um 25% - 40%, breytilegt eftir því hvenær lán voru tekin og í hvaða mynt. Dæmi eru um lægri lækkun höfuðstóls lána sem tekin voru eftir mestu gengisfellingarnar, en einnig dæmi um mun meiri lækkun í þeim myntum sem þróast hafa á versta veg fyrir lántaka.

Rétt er að vekja athygli á því að óvissa ríkir um skattaleg áhrif þessara breytinga.

Næstu vikur

Landsbankinn mun þegar hefjast handa við úrvinnslu og endurreikning lána og framsetningu nýrrar greiðsluáætlunar eftir því sem við á. Slíkt getur tekið nokkrar vikur og biður bankinn viðskiptavini að sýna biðlund vegna þessa. Samkvæmt tilmælum FME og Seðlabanka skal endurreikningi lána lokið fyrir 1. september nk.

Viðskiptavinir sem þegar hafa greitt upp lán sem tilmælin taka til, munu fá endurgreitt það sem ofgreitt hefur verið. Viðskiptavinum sem þegar hafa þegið einhver af greiðsluerfiðleikaúrræðum bankans, en telja nú að þau eigi ekki við eða að þau þurfi að endurskoða, er bent á að snúa sér til bankans.

Öllum viðskiptavinum sem þessi mál varða, verður á næstu dögum sent bréf með leiðbeiningum um næstu skref og hvaða aðgerða sé þörf af þeirra hálfu.

Eldri úrræði bankans vegna greiðsluerfiðleika einstaklinga verða áfram í boði og m.a. verður boð um höfuðstólslækkun erlendra lána framlengt til 30. september.

Áhrif á bankann

Augljóst er að þessar breytingar sem nú verða gerðar á lánasafni bankans munu hafa áhrif á stöðu hans og valda því að eiginfjárhlutfall bankans lækkar. Nákvæmur endurreikningur lána og endurgreiðslur til viðskiptavina eftir atvikum, munu svara því hversu mikil áhrifin verða en að öllu öðru óbreyttu er ljóst að bankinn stendur eftir sem áður traustum fótum.

Lausafjárstaða Landsbankans er sterk og rekstur bankans er góður. Stjórnendur og starfsmenn bankans hafa ríkan metnað fyrir hans hönd og telja tækifærin á markaði mikil fyrir vel rekinn banka í almannaeigu í nánustu framtíð.

Óumdeilt er að margt fór úrskeiðis í rekstri fjármálafyrirtækja á árunum fyrir bankahrun, þar með talið við lánveitingu gengistryggðra lána. Landsbankinn harmar þau óþægindi sem viðskiptavinir hafa orðið fyrir af þessum sökum.

Til baka