Fréttir og tilkynningar - 1. júní 2010 09:35
Steinþór Pálsson tekur við af Ásmundi Stefánssyni
Ásmundur Stefánsson lætur af störfum sem bankastjóri Landsbankans (NBI hf.) frá og með deginum í dag. Við starfinu tekur Steinþór Pálsson.
Ásmundur hefur gengt stöðu bankastjóra frá 1. mars á síðasta ári, en hann var áður formaður bankaráðs frá nóvember 2008. Hann kom til liðs við Landsbankann eftir að hafa sinnt samræmingarhlutverki fyrir hönd ríkisstjórnar Geirs H. Haarde strax eftir hrun íslensku bankanna.
Ásmundur tók við rekstri bankans á erfiðum tíma en hefur tekist að byggja Landsbankann upp og skilar honum af sér í traustri stöðu eins og sjá má af afkomu bankans fyrstu þrjá mánuði ársins.
Bankaráð Landsbankans þakkar Ásmundi vel unnin störf.
Í dag tekur Steinþór Pálsson til starfa sem bankastjóri. Eru miklar vonir bundnar við ráðningu hans. Verkefni hans verður að móta bankanum framtíðarsýn með því að byggja á því sem gert hefur verið, en leita jafnframt nýrra leiða til að uppfylla metnaðarfull markmið bankans.
Steinþór Pálsson hefur langa og farsæla reynslu af stjórnunarstörfum við rekstur bankastofnana og framleiðslufyrirtækja innanlands og erlendis og mikla reynslu af breytingastjórnun og stefnumótun.
Starfsferill:
| 1986-1989 | Framkvæmdastjóri lánasviðs Verzlunarbanka Íslands |
| 1990-2000 | Starfsmaður Íslandsbanka, m.a. sem forstöðumaður lánadeildar, fjárfestingarlána útibúaþjónustu, áhættustýringar og fyrirtækjaþjónustu auk þess sem hann var virkur í stefnumótunarstarfi Íslandsbanka og samrunaferli forvera hans. |
| 2001-2002 | Fjármálastjóri- og rekstrarstjóri, Urður, Verðandi og Skuld |
| 2002-2010 | Framkvæmdastjóri Actavis á Möltu, framkvæmdastjóri Actavis í Bandaríkjunum og nú tæp 2 síðustu árin framkvæmdastjóri Actavis samstæðunnar á Íslandi á sviði stefnumótunar. |
Til baka