Fréttir og tilkynningar - 31. maí 2010 16:36
Landsbankinn hagnast um 8,3 milljarða fyrstu þrjá mánuði ársins
Arðsemi eiginfjár 21%
Árshlutareikningur fyrsta ársfjórðungs 2010
Afkoma Landsbankans var jákvæð um 8,3 milljarða króna eftir skatta á fyrsta ársfjórðungi ársins 2010. Hagnaður bankans allt síðasta ár var 14,3 milljarðar króna. Þá nam arðsemi eiginfjár um 10%.
Eiginfjárhlutfall Landsbankans nemur nú 16,3% og uppfyllir því bankinn kröfur Fjármálaeftirlitsins um 16% lágmarks eiginfjárhlutfall.
Helstu stærðir úr rekstri og efnahag eru:
- Hagnaður eftir skatt nam 8,3 milljörðum króna.
- Arðsemi eigin fjár var 21%
- Vaxtamunur af meðalstöðu heildareigna var 2,5%.
- Eigið fé bankans er nú 166 milljarðar króna.
- Eiginfjárhlutfall (CAD -hlutfall) var 16,3% samanborið við15% í árslok 2009.
- Heildareignir bankans voru 1.113 milljarðar króna í lok mars 2010.
- Innlán í hlutfalli við útlán til viðskiptavina eru 67% en voru 68% um síðustu áramót
- Rekstrarkostnaður bankans af reglulegri starfsemi nam 4,0 milljörðum króna.
Árið 2009 var fyrsta heila starfsár Landsbankans og afar óvenjulegt í alla staði. Fyrri hluti þess var bankanum afar mótdrægur en síðari hluta ársins batnaði afkoman verulega. Segja má að fyrsti ársfjórðungur ársins 2010 sé rökrétt framhald þeirrar þróunar og hefur rekstur bankans verið viðunandi. Þó ber þess að geta að gengisþróun hefur verið bankanum hagfelld á þessum tíma og skiptir miklu um arðsemi hans.
Afkoma á árinu 2008, miðað við tímabilið 7. október til 31. desember, var neikvæð um 6,9 milljarða króna og arðsemi ársins 2009 ófullnægjandi eða nokkru lægri en sá fjármagnskostnaður sem ríkið bar af hlutafjárframlagi sínu til bankans.
Landsbankinn hefur það sem af er árinu 2010 haldið áfram þróun umfangsmikilla ráðstafana til aðstoðar einstaklingum, fjölskyldum og fyrirtækjum sem eiga í erfiðleikum. Nú síðast kynnti bankinn 25% lækkun höfuðstóls erlendra lána bæði einstaklinga og fyrirtækja. Með þessu móti kemur bankinn til móts við kröfur um niðurskriftir skulda í verulegum mæli.
Landsbankinn er stærsta fjármálastofnun landsins og rekur 36 útibú og afgreiðslur um land allt. Íslenska ríkið á rúm 81% í Landsbankanum (NBI hf.) og Skilanefnd Landsbanka Íslands hf. fer með tæplega 19% hlut. Rúmlega 1100 starfsmenn starfa hjá bankanum.
Helstu dótturfélög Landsbankans eru eignaleigufyrirtækið SP Fjármögnun, Landsvaki sem annast rekstur verðbréfasjóða og fjárfestingarsjóða., eignaumsýslufélögin Reginn og Vestia, Horn sem fer með hlutabréfaeign bankans í öðrum félögum, og Hömlur þar sem smærri eignir bankans eru vistaðar tímabundið fyrir sölu.
Umfangsmikið endurskipulagningarstarf hefur farið fram í bankanum allt frá hruni og allt skipulag hans, verkferlar og vinnubrögð verið endurskoðað. Steinþór Pálsson tekur við sem bankastjóri Landsbankans 1. júní. Ásmundur Stefánsson lætur þá af störfum.
Ásmundur Stefánsson bankastjóri segir:
"Ég læt nú af störfum sem bankastjóri Landsbankans eftir að hafa gengt því starfi í 15 mánuði. Þetta hefur verið erfiður tími í sögu bankans en með öflugri og samhentri vinnu hæfra starfsmanna, hefur tekist að koma rekstrinum í ásættanlegt horf. Bankinn hefur nú allar forsendur til að takast á við það hlutverk sem hann ætlar sér sem stærsta fjármálastofnun landsins og að vera leiðandi í endurreisn efnahagslífsins. Það er ánægjulegt að skila af sér traustu búi.
Ég vil nota þetta tækifæri til að þakka bankaráði, samstarfsfólki mínu og viðskiptavinum fyrir mjög gott samstarf á þeim tíma sem ég hef verið i Landsbankanum. Ég óska bankanum alls hins besta í framtíðinni og eftirmanni mínum velfarnaði í starfi."
Árshlutareikningur fyrsta ársfjórðungs 2010
Nánari fjárhagslegar upplýsingar um Landsbankann
Til baka