Fréttir og tilkynningar - 5. febrúar 2010 15:14

Landsbankinn framlengir bakhjarlasamning við Sjónarhól

Landsbankinn hefur frá upphafi verið einn bakhjarla Sjónarhóls ráðgjafarmiðstöðvar fyrir foreldra barna með sérþarfir, og samstarfið verið mikilvægur hlekkur í samfélagsstuðningi bankans alla tíð. Óskar Hafnfjörð Auðunsson, markaðsstjóri Landsbankans, skrifaði í dag undir nýjan bakhjarlasamning til næstu þriggja ára. Að auki endurnýjuðu Actavis og Kvenfélagið Hringurinn stuðning sinn.

Stuðningur bakhjarlanna hefur alla tíð verið miðstöðinni afar mikilvægur og er nú "í raun lykillinn að áframhaldandi starfi ráðgjafarmiðstöðvarinnar" segir í tilkynningu frá Sjónarhóli. Þessi stuðningur ásamt og með stuðningi ríkisstjórnarinnar að viðbættu fé sem safnaðist í landssöfnuninni "Fyrir sérstök börn til betra lífs" haustið 2003, gerði stofnun Sjónarhóls mögulega. Frá því Sjónarhóll opnaði haustið 2004 hafa vel á annað þúsund foreldrar leitað ráðgjafar þar vegna barna sinna.

Á Sjónarhóli starfa nú tveir foreldraráðgjafar auk þess sem framkvæmdastjóri sinnir ráðgjöf að hluta. Ráðgjafar Sjónarhóls veita foreldrum leiðsögn og stuðning, enda nógu alvarlegt að eiga barn með sérþarfir þó ekki þurfi jafnframt að eyða kröftum í að leita og berjast fyrir eðlilegum og sjálfsögðum réttindum. Mikil áhersla er lögð á að þjónustan sé aðgengileg og er ráðgjöf á vegum Sjónarhóls veitt endurgjaldslaust. Þjónusta Sjónarhóls er ætluð öllum óháð aldri barnins, einnig þeim sem eiga uppkomin börn. Það nægir að foreldrar/fjölskyldan hafi áhyggjur af líðan eða þroska barnsins til að fá ráðgjöf. Til að panta tíma hjá ráðgjafa þarf hvorki að liggja fyrir greining eða tilvísun frá fagaðilum.

Vefur Sjónarhóls

Til baka